Jan 302012
 

متاعِ غیر

میرے خوابوں کے جھروکوں کو سجانے والی
تیرے خوابوں میں کہیں میرا گزر ھے کہ نہیں
پوچھ کر اپنی نگاہوں سے بتا دے مجھ کو
میری راتوں کے مقدر میں سحر ھے کہ نہیں

چار دن کی یہ رفاقت جو رفاقت بھی نہیں
عمر بھر کے لیے آزار ہوئی جاتی ھے
زندگی یوں تو ھمیشہ سے پریشاں سی تھی
اب تو ہر سانس گراں بار ہوئی جاتی ھے

میری اجڑی ہوئی نیندوں کے شبستانوں میں
تو کسی خواب کے پیکر کی طرح آئی ھے
کبھی اپنی سی کبھی غیر نظر آئی ھے
کبھی اخلاص کی مورت کبھی ہرجائی ھے

پیار پر بس تو نہیں ھے میرا لیکن پھر بھی
تو بتا دے کہ تجھے پیار کروں یا نہ کروں
تو نے خود اپنے تبسم سے جگایا ھے جنہیں
ان تمناوں کا اظہار کروں یا نہ کروں

تو کسی اور کے دامن کی کلی ھے لیکن
میری راتیں تیری خوشبو سے بسی رہتی ہیں
تو کہیں بھی ہو تیرے پھول سے عارض کی قسم
تیری پلکیں میری آنکھوں پہ جھکی رہتی ہیں

تیرے ہاتھوں کی حرارت تیرے سانسوں کی مہک
تیرتی رہتی ھے احساس کی پہنائی میں
ڈھونڈھتی رہتی ہیں تخیل کی بانہیں تجھ کو
سرد راتوں کی سلگتی ہوئی تنہائی میں

تیرا اندازِ کرم ایک حقیقت ھے مگر
یہ حقیقت بھی حقیقت میں فسانہ ہی نہ ہو
تیری مانوس نگاہوں کا یہ محتاط پیام
دل کے خوں کرنے کا ایک اور بہانہ ہی نہ ہو

کون جانے میرے امروز کا فردا کیا ھے
قربتیں بڑھ کے پشیمان بھی ہو جاتی ہیں
دل کے دامن سے لپٹتی ہوئی رنگیں نظریں
دیکھتے دیکھتے انجان بھی ہو جاتی ہیں

میری درماندہ جوانی کی تمناوں کے
مضمحل خواب کی تعبیر بتادے مجھ کو
تیرے دامن میں گلستاں بھی ہیں ویرانے بھی
میرا حاصل میری تقدیر بتا دے مجھ کو

ساحر لدھیانوی

 Posted by at 12:50 pm

Sorry, the comment form is closed at this time.